مشاهدة النسخة كاملة : >> عذاب الروح من حبيب الروح <<
هذه قصة واقعية كتبها زميل لي واحببت ان تقرأوها
كاتب القصة الحقيقي / خالد
كتبها لكم / نسناس
.........................
>> عذاب الروح من حبيب الروح <<
قصة واقعيه حدثت في الرياض احداث القصه حول خالد وعنود
خالد على عادته من البيت لشغله من الشغل للشباب روتين يومي ويوم من الأيام يوم غير مسار حياة خالد وقلب روتينه .
ومره وخالد طالع على عادته من البيت لدوامه والطريق زحمه والناس مالها خلق على احد . وعنود بنت زيها زي اي بنت طالبه في الثانوي وجدن عاديه روتينها عادي من المدرسه للبيت ومن البيت الى بيت اقاربها البنت حلوه وخفيف دمها ومرحه بس متعقده من الطبخ والكرف في البيت ومع ذلك ماخذه الدنيا بسعت صدروفله وهي في طريقها للمدرسه ومع زحمت السيارات صار لها حادث فضيع والبنت اغمي عليها من الروعه و بدأت المعانات .
خالد حادث على الصبح الله يستر وقف خالد ونزل من السياره وشاف البنت مسكينه مغما عليها والسواق خشمه ينزف وضربه خفيفه في صدره من الدرقسون
شال خالد البنت هو والسواق وطلب من السواق يركب معه ورفض السواق بيجلس عند السياره ويستنا المرور
قال خالد خلاص بوديها لمستشفى دله
اخذ خالد رقم جوال السواق وراح خالد ومعه البنت مسكينه دايخه وعبأتها محتاسه ووجها طالع المهم وصل المستشفى ودخل البنت الطوارى طلب من خالد مبلغ 2000ريال تأمين دفع خالد المبلغ وجلس محتار يترك المسكينه ويروح لدوامه اويجلس مع البنت ويطنش الدوام .. يطالع في البنت وصعبت عليه المهم طنش خالد دوامه وجلس في قسم الطوارى مع البنت اخذو اشعه للبنت المسكينه وطلعت سليمه ولله الحمد .. دق خالد على السواق وكلمه وعرف خالد ان السواق يبي يحجز في المرور حتى حضور كفيله .
رجع خالد للبنت وجلس يستنا احد من اهلها وطال انتظاره خالد طفش وطلع للكوفي شوب وطلب كروسان وفطاير وجلس يأكل وبعد ماخلص رجع للطوارى وجلس يستنا البنت ماهي في السرير اعتقد خالد انها في قسم الأشعه وجلس يستنا ماحصل احد رجع وسأل الدكتور عن البنت وجاوبه الدكتور ان والد البنت كان موجود وانه طلعها وأخذ باقي التأمين ١٢٠٠ريال لأن علاج البنت مع الأشعه والتحاليل ب٨٠٠ريال .. ويمكن تحصله في المواقف طلع خالد على المواقف ماحصل احد طقت كبد خالد من القهر الدوام طنشه والفلوس طارت ركب خالد سيارته وسيده للمغسله يغسل السياره لأن المرتبه والباب فيها دم دق خالد على السواق حصل جواله مقفل ارسل خالد رساله لسواق يقول فيها انه هو الذي اسعف البنت رجع الى البيت بعد صلاة الظهر طفشان نام من الطفش وصحى بعد المغرب طلع لربعه وقص لهم قصته ضحكو عليه وجلسوا يتريقون عليه وخالد مقهور من احداث يومه كلها وزاد الطين بله على قولتهم تريقت الشباب .. طفش خالد وطلع مقهور ومتضايق طلع محمد صديق خالد وقام يهدي في خالد ويسولف معه ومع السوالف سأل محمد خالد البنت حلوه سؤال قلب خالد فوق تحت طالع خالد في محمد وقال اقولك صاير لها حادث يعني مافيه مجال الواحد يفكر زينه او شينه سكت محمد وغيرالسالفه وقال انت سويت معروف خلا ص قطه في البحر وانس البنت والحادث والفلوس بيعوظك الله .
رجع خالد لبيتهم بعد ماقضى السهره مع صديقه محمد وجلس يفكر في كلام صديقه محمد عن البنت زينه او شينة وجلس يتخيل وجه البنت ويفكر ولا جاه نوم .. المسكين اذن الفجر وقام يصلي وبعد الصلاة طلع لدوامه وبدأ مدير خالد ليش غايب جاوبه خالد انه صار حادث والخ .. ضحك المدير وقال خلاص قول للمتابعه سالفتك اللي ماتدخل العقل جلس خالد محتار ومقهور الفلوس طارت والدوام غياب وحسم من الراتب وتعهد .
البنت طبعن ماراحت للمدرسه والتقرير الطبي معها وبعد اسبوع داومت البنت وجلست مع صديقاتها تسولف لهم عن الحادث وعن الي اسعفها ووداها لمستشفى دله.
وسألتها وحده من صديقاتها طيب تعرفين اللي اسعفك جاوبت البنت طبعن لا .. قالت صديقتها طيب من دفع فلوس المستشفى البنت بكل ثقه طبعن الوالد الله يخليه لنا
وبعد مارجعت البنت من المدرسه سألت ابوها وقالت إن صديقاتي يسألون كم كلف علاجي .. ان مستشفى دله غالي ويضربون في السعر .
استغرب ابو البنت من السؤال وقال باقي لكي معي ١٢٠٠ريال وعلاجك ب ٨٠٠ريال استغربت البنت من رد ابوها وقالت اي باقي وجاوب انتي دافعه لهم تامين ب٢٠٠٠ريال قالت البنت انا مادفعت ولا معي هالمبلغ استغرب ابوها من اللي دفع الفلوس شكوا في اللي اسعفها سألوا السواق تعرف رقم جواله وجاوبهم مافيه معلوم اول هو فيه كلام انا جوال بس انا مافيه سجل نمبر هو.
احتارت البنت من ابن الحلال الي ساعدها ودفع الفلوس عنها استعانت البنت بصديقه لها تسأل في قسم طوارى مستشفى دله يمكن حاط اسم له او رقم تلفون ولاكن دون جدوا. وبعد مرور سنه ونصف على السالفه السواق سافر اجازه وجواله اعطاه لكفيله فترة سفره حتى يرجع من السفر والكفيل اخذ الجهاز وحطه عنده في البيت طبعن عنود تخرجت من الثانوي وبالجامعه ومخلصه مستوى ثاني وطبعن جوالها استقبال وطلبت من ابوها جوال السواق بتشحنه وتكلم صديقاتها فتره وبترجعه اخذت عنود الجوال وشحنت وجلست تلعب على صديقاتها ومحد يعرف انها العنود ترسل لهم رسايل تهديد وتلعب في اعصاب صديقاتها وطبعن صديقاتها الي مطنشه والي قفلت جوالها والي ترسل مين انت وش تبي .
والعنود مستانسه وجالسه تضحك وترسل لهم رسايل تهديد وفجئه جلست تلقف في رسايل السواق وشد انتباهها رساله تقول انا الي اسعفت البنت .
............
ماذا فعلت العنود بعد ذلك انتظروا الجزى الثاني من القصة ؟
في الايام القادمة
الألمــاسي 04-23-07, 04:53 PM الله يعطيك العافيةو الله مشوقة..
يالله نبي التكملة تكفى.
تحياتي لك..((ولد ابو متعب))..
مشكور اخوي على مرورك وانتظر الجزء الثاني
الجزء الثاني من القصة
.............
العنود شافت الرساله وانهبلت وعلى طول دقت على صديقتها مها ومها انهبلت وش يبي الحقير وش عنده يدق والعنود تدق وترسل لها مها ردي بسرعه جن جنون مها ودقت على ساره صديقتها وهي خايفه وتبكي ردت ساره اهلين مها وش فيك وش صاير تو مها بتقول السالفه لساره وفجئه جت رساله لمها تقول فيها ردي انا العنود ابيك ضروري مها شافت اسم العنود ولأشعور صرخت وقفلت بوجه ساره وعلى طول دقت على العنود وهي تهاوش وتسب العنود ناسيه انها تستهبل عليهم وقالت العنود مها عرفت الي اسعفني عرفت رقمه .. وساره المسكينه بدت توسوس وش فيها مها اكيد اهلها صاير لهم شي .
المشكله جوال ساره مافيه شحن ومره منشغل بالها على مها .
والعنود جالسه تفكر هي ومها تدق عليه او ماتدق وفجئه ذكرت مها ساره ودقت عليها وشبكو مكالمه جماعيه مع بعض عرفت ساره السالفه وقالت للعنود دقي او ارسلي له رساله . احتارت العنود وفي الأخير ارسلت له بيت شعر تقول فيه
# اذا مالت شمسك للمغيب وتذكرت كل غالي وحبيب ،
فجعل لي من الذكرآ نصيب #
وبعد ما أرسلت الرساله لخالد جلست تستناه يدق وطال انتظار العنود وحست انها استعجلت برسالتها وتضايقت ليتي ماارسلت . طبعن خالد كان نايم ولما صحى شاف الرساله جلس يطالع في الرقم ماهو غريب عليه رجع لغرفته واخذ جهازه القديم وقام يبحث فيه وحصل الرقم مخزن عنده وعرف انه تبع السواق ومن الفرحه ارسل له
رد يقول فيها
#جتني رساله شالت الهم عني ¤
نستني جروح الليالي والأيام ¤
منك الرساله يوم جتني خذتني ¤
من عالم التفكيرلديار الأحلام ¤
أدري وفي وفيك ماخاب ظني ¤
من لامني فيك جعله اليوم ينلام ¤
المسكين خالد جلس يفكر واسترجع الماضي وهو يبتسم حاس بفرح ووناسه .
وصلت الرساله العنود وهي في المحاضره وبعد ماخلصت المحاضره طلعت للمصلى مكان دايم يجتمعون فيه صديقاتها وقالت لساره انها ارسلت امس باليل له بيت شعر وقالت لها بيت الشعر وانه ارسل لي قبل شوي وانا في المحاضره أخذت ساره الجوال وقرت الرساله وامعنت النظر في الرساله وشفايف ساره تبتسم بدون شعور وطالعت الرقم وحفضته بدون ماتحس العنود بشي قالت ساره خلاص انتبهي لا ترسلي او تدقي اوتردي عليه خليه ليوم السبت احلى . ماعندنا محاضرات ونلعبها عليه صح وافقت العنود
وبعد ماطلعوا البنات من الجامعه لبيوتهم ساره طلبت من الخدامه تجيب الغدا في غرفتها
واما العنود حصلت الغدا جاهز تغدت ومسكينه بدت شغل في المطبخ تغسل مواعين الغدا وهي تبتسم من رسالت خالد لها وحست انها متعلقه فيه وتنتظر السبت على نار . وبعد صلاة العصر مشت العنود مع اهلها لسدير زياره لعمانها .
طبعن ساره حافظه الرقم بدلت ملابسها وتغدت وبعد صلاة العصر طلعت مع السواق لمجمع الاتصالات وشرت شريحه بدون اسم وارسلت لخالد تقول له لأترسل على الرقم الأول لان ابوي اخذه مني وانتبه لو ارسلت لاترسل لي ارسل على هذا الرقم هذا رقم خاص فيني استانس خالد وجته الجراءه ودق عليها
....................
ماذا دار بينهم في هذه المكالمة هذا ماشوف تعرفونة في الجزء الثالث
الألمــاسي 04-26-07, 09:01 PM اااااااااااااااااااخ منك انفعلت مع القصة بسرعة نبي الجزء الثاالث...
بليز سريع..
تحياتي ((ولد ابو متعب))...
نريــــــــــــــــــــــــــد الجزء الثالث لتكتمل الروايه ياخوي يانسناس
الجزء الثالث
................................................
وجلس يسولف معها حوالي ٤ ساعات من اول مكالمه قفلوا وبعد صلاة العشاء دقت ساره على خالد دقه وسكرت . دق عليها خالد وجلسوا يسولفون وقامت ساره تسولف عن حياتها وعن انها بنت عايشه في نعمه وان ابوها عنده شركه كبيره واخوها توه في سن المراهقه ومعه سياره اخر موديل من نوع لكزز وامها وارثه من ابوها فلوس وشقق وعند امها مشاغل . والمسكين خالد قاعد يفكر اطلب منها فلوسي ٢٠٠٠ ريال الي دفعتها عليها في مستشفى دله .بحكم انه انسان طفران وعلى قد حاله .
احتار كيف يطلب فلوسه منها واخر شي طلب خالد من ساره توصف له بيتهم بيجي يقابل ابوها رفضت ساره وزعلت على خالد وطلبت منه يقفل موضوع جيته لبيتهم طفش خالد من ساره وحس ان البنت تصرفه . وجلس يفكر البنت تقول انها كاش وعندهم شركات وشقق وجوالها سوا وتدق وتقفل عجيب اكيد ان ابوها قعيطي او انها تكذب عليه . اما العنود كانت تستنا يوم السبت بفارغ الصبر وماتدري عن خيانت ساره . وفي اليوم المنتظر بفارغ الصبر عند العنود ماداومت ساره انقهرت العنود وجلست مع صديقتها مها يتشاورون وبعد التفكير دقت العنود على خالد وشاف خالد رقم السواق وطنشه فكره ابوساره لأنها تقول ان الجوال معاه . احتارت العنود ليه مارد عليها وفي الاخير ارسلت له مسج استغرب خالد ليه تدق وترسل مسج من الجوال وهي تقول انه مع ابوها احتار خالد ودق عليها وطول وهو يرن والعنود تقوم وتجلس لاشعور مستحيه وخجلانه وفي الرنه الأخيره ردت العنود بصوت خافظ يتملكه ارتباك وحيا استغرب خالد من نبره الصوت وسوا نفسه طبيعي وسألها خالد غريبه داقه من جوال السواق وين جوالك العنود بحسن نيه جوالي استقبال وجلست البنت تشكر في خالد انه اسعفها والمعروف الي سواه معها بدفع الفلوس وطلبت العنود من خالد يرسل رقم حسابه على اساس انها تبي تقول لبوها يرجع له فلوسه .
احتار خالد في الصوت وفي اخلاق البنت وهوساكت وفجئه دقت ساره وشاف خالد الرقم وطلب من العنود انتظارها شوي بيرد على مكالمه شوي بس ورد وسمع صوت ساره وقال لها انه مشغول شوي وبيدق عليها ورجع خالد لمكالمته الاولا العنود ولا جاب لها طاري وطبعن بدت السوالف الحلوه مع العنود وبدت العنود تكلم عن نفسها وعن حياتها الخاصه وبعد ماقفلت العنود رجع خالد ودق على ساره وجلس يسولف معها وسالها عن جوال ابوها وساره تضايقت وطلبت من خالد يقفل على الموضوع نهائي ومايفتح سيرته مره ثانيه.
ماذا حصل بعد ذلك هذا ماسوف تعرفونة في الجزء الرابع ؟
.................................................. .
ترقبوا قريباً قصة واقعية ومؤثرة ... طلبت من الكاتب ان يكتبها بأسلوبة المشوق والرائع وقد وضع لها عنوان وهو ( بدون مقدمات ياليتة مات )
للكاتب / خالد ..... الملقب بـ ( من اسير الحب الى اغلا سجانة )
الألمــاسي 04-28-07, 05:46 PM يا حبي لك...
بانتظااااااااااار الجزء الرابع...
والله انها قصة رهيبة...
دروب المحبه 04-29-07, 06:46 PM اخوي نسناس انتظر الجزء الرابع بفارغ الصبر اتمنى تحطه الحين
سي يوو
ضوء الأحلام 04-30-07, 08:57 PM http://www.4zz.net/up/uploads/b00d7d3547.gif (http://www.4zz.net/up)
أنا في العادة لا أقرأ إلاّ القصص المكتملة
لاكن هذه القصه جذبتني لما فيها من واقعيه
فأرجو منك أخي الكريم نسناس تكملتها وعدم الإطالة علينا
كل الشكر لك ولجهودك المبذولة
تحيتي،،
http://www.4zz.net/up/uploads/ff0776eb6e.gif (http://www.4zz.net/up)
الجزء الرابع من القصة
..............................
إحتار خالد وإحتاس ليه سوت كذا ساره الموضوع اكيد فيه إنا . طلب من ساره تقابله فوافقت ساره بشرط تقابله في السوق وافق خالد وقابل ساره وشافها في العبايه فطلب منها ان تكشف وجهها فكشفت وعرف خالد انها ليست نفس البنت وسكت ... سألها احلى سمنتي اول كنتي نحيفه قالت ساره اول كنت مسويه (dait) وبطلت الحين وشكلي برجع لنفس ال(Program)البرنامج السابق ايدها خالد وشجعها انها تسوي dait)) بس نذاله عشان تجوع . قال لها تعالي نجلس في الكوفي فيه قسم عوائل رفضت بحجة انها مستعجله . وبعد ماراحت ساره دق خالد على العنود وجلس يسولف معها والبنيه مسكينه على نياتها ماتعرف عن خيانة ساره لها .. طلب خالد من العنود ماتجيب سيره لصديقاتها إنها كلمته ومايبي احد يعرف عن اتصالاته شي وبعد فتره قابل خالد ابوالعنود واعطاه المبلغ وشكره المهم تطورت علاقة خالد وابو العنود وطلب خالد العنود من ابوها رسمي واخذ الموافقه مبدئي ووصل الخبر ساره وحقدت عليهم وحست انهاغبيه وانجن جنونها ليش يستغلونها وان العنود خانتها ليش تكلمه من وراها . وبدأت المعاناة
دقت ساره على خالد دقه وسكرت والمسكين مزكوم وتعبان و(مدهن بفقس) ونايم وجواله على الصامت وساره تدق وتسكر واخر شي واصلت دق وبرضه مايرد انقهرت ساره وحقدت (كيدهن عظيم) ودقت ساره على العنود وبرضه الخبله المسكينه جوالها في غرفتااااااا وهي في المطبخ توها مخلصه من لقط القهوه وحمستااااا وطحنتااااااا
المهم انواع (effort) الجهد وساره تدق والمسكينه العنود تطحن وبعد ماخلصت رقت لغرفتها وطالعت جوالها .. 10مكالمات لم يرد عليها ابتسمت وهي تقول
(الله حشى حشى) طالعت المكالمات لقتها من ساره استغربت دقت عليها وعلى طول ردت ساره وهي تهاوش وتزاعق ليه مطنشه ليه مارديتي .. العنود خبله قلبها طيب .. لاتهاوشين كنت احمس القهوه وبعدها طحنتها ارتاحت ساره وحست بنوع من الدلاخة
بس مقهوره من خالد ليش مارد وبدت الشياطين تلعب معها رجعت ساره ودقت على العنود وقالت ابزورك اليوم فرحت العنود(زياره هادفه) زارت ساره العنود وطبعن جلسوا في مجلس النساء وطلبت ساره من العنود انهم يجلسون في غرفة العنود طبعن العنود غرفتااااا محتاسه فوق تحت المهم جلست ساره تلقف في كشكول العنود ولقت ابيات شعر وشدها شطر يقول >>يامن هواه اعزه واذلني<<
وقصيده ثانيه تقول>>
"تبت يد" اللي مايحبك ويغليك!!
واللي جفاك أكتب له الفين((تبا))
تفرح عيون" دايم الوقت ترجيك!!
ويفخر فؤاد من شروقك ((تربا))
طاريك جاني ومن طراويك لبيك!!
لاصارمابه غير صوتك(( يلبا ))..<<
جن جنون ساره لماقرت في بداية كل بيت ونهايته كاتبه العنود احبك خالد المهم العنود راحت تجيب قهوه وساره تليقف واخر شي دقت ساره على خالد من جوال العنود ورد خالد وعلا طول سكرت ساره وشكت ساره ان خالد مطنشها عشان العنود واكيد مقابلها وا وا الذي منه ودارت فكره في راس ساره (تلعب مع الشياطين) يعني راحوا فيها..
.................
ماهي هذه الفكرة التي دارت في رأس سارة .. هذا ماسوف تعرفونة في الجزء الاخير من القصة ؟
دروب المحبه 05-01-07, 05:04 PM الله القصه حماس بس مو كأن الجزء قصير شوي
في انتظار الجزء الأخير
سي يووو
الألمــاسي 05-02-07, 02:05 PM والله قصة حماااااااااااااس...
الله يستر من سارة..
يالله نبي التكملة..
اخونا الغالي نسناس...
ضوء الأحلام 05-02-07, 03:41 PM http://www.4zz.net/up/uploads/b00d7d3547.gif (http://www.4zz.net/up)
ماهي هذه الفكرة التي دارت في رأس سارة .. هذا ماسوف تعرفونة في الجزء الاخير من القصة ؟
ياالله لازم حركات الخيانه ياكرهي للخيانه وأصحابها
أصعب حاجه لما يغرز خنجر الخيانه في ظهرك ومن من؟! من أعز وأقرب الناس إلك ( الصديق )
يعطيك العافيه أخوي نسناس على الجزء وفي إنتظار الجزء الأخير
نرجو عدم الإطاله..
تحيتي،،
http://www.4zz.net/up/uploads/ff0776eb6e.gif (http://www.4zz.net/up)
الجزء الاخير
....................
المهم بعد اسبوع زارت ساره بنت خالها اسمها حصه وطلبت منها خدمه بحكم القرابه وجلست تسولف على بنت خالها حصه عن صديقتها العزيزه الغاليه العنود وانها بدت في الانحراف وانها تطلع مع واحد اسمه خالد تعرفت عليه في الحادث الي صار لها وطلبت ساره من قريبتها حصه تدق على جوال ام العنود بحجة انها من صديقاتها وتقول لها ان بنتك تطلع مع واحد اسمه خالد وفعلا" دقت وقالت لام العنود وفي نهاية الكلام قالت حصه خاله مابي العنود تعرف اني قايله لك لاني مابي اخسرها واني خايفه عليها طبعن حصه ماتعرف العنود ولاتعرف ام العنود . ضاقت الدنيا بأم العنود وقالت في نفسها معقوله العنود تسوي كذا الله يستر جلست ام العنود ولا جابت طاري للعنود وراقبت العنود من بعيد لبعيد ولاحضت ان العنود دايم في غرفتااااا
وصرات امها شكاكه حست العنود ان اسلوب امها تغير وقالت لخالد اقترح خالد اقتراح انها تواجه امها وتعرف السبب الي غيرها . استجمعت العنود المتبقى من قواها بعد الطبخ والمواعين وواجهت امها بكل قوه وشجاعه وسألت امها ليش تغيرت استغربت امها من براءت العنود وقالت لها ان وحده من صديقاتها داقه وقايله لها كذا وكذا وبدون مقدمات بكت العنود وراحت لغرفتااااا
وجلست تبكي ودقت على خالد وقالت له السالفه وعلى طول خالد قالها ان الي داق ساره وانها سوت وسوت معه رجعت العنود وقالت لامها من الي داق عليك ومنهو شبهه الصوت قالت ام العنود انها فيها لتغه وان صوتها خشن شوي ورقمها مخزنته عندها بأسم فاعلة خير .
احتارت العنود . وطلبت من صديقاتها يزورونها في البيت وفعلن زاروها وساره كانت من ظمن البنات اجتمعو وجابت العنود القهوه والشاي وحطت العشاء وجلسن البنات يدقن وراحت العنود لشنطة ساره واخذت جوالها ودقت نفس الرقم الي داق على امها وطلع مخزن عند ساره باسم حصه خذت الجوال وعلى طول راحت لم امها وقالت لها اخذت ام العنود الجوال وطلبت من بنتها تروح عند صديقاتها وتجلس معهم عشان ماتلفت انتباه ساره لان ام العنود بتكلم من جوال ساره البنت ودقت على البنت وعلى طول ردت حصه كلمتها ام العنود وقالت لحصه انها سألت ساره عنك وانها قالت انك انتي صاحبة الفكره انهبلت حصه وقالت ان ساره هي الي طالبه منها واهي معطتني رقمك وانها خايفه على العنود من خالد قفلت ام العنود وطلبت من العنود تقول لساره تأخر في الروحه ان فيه موضوع بتقوله لها راحوا البنات وبقت ساره وهي متحمسه تظن الموضوع يدور عن خالد وفجئه دخلت ام العنود وطلبت من ساره اجابه على الحركه الي سوتها هي وحصه وجلست تهاوش في ساره وأقرت ساره وقالت ان العنود بعد تكلم خالد وانها مقابلته انهبلت ام العنود وسألت بنتها وبكل ثقه جاوبت لا وان خالد ماهو راعي لف ودوران وانه رجل بمعنا الكلمه وبعدين خالد خاطبني كيف يخطب وحده تطلع . وطلبت ام العنود من ساره ماتدخل في حياة بنتها وتبعد عنها انقهرت ساره وطلعت تبكي قهر وهي راجعه مع السواق لبيتهم مقهوره ومتضايقه من الي صار الدلخه عنود لعبتها صح وبعد فتره اعلن خالد خطوبته من العنود بشكل رسمي وتملكوا وطلب من ابوالعنود الاذن انه ياخذ العنود تختار معه اثاث الشقه طبعن بحكم انها زوجته على سنة الله ورسوله بدا خالد اثاث والفرحه ماليه الدنيا عليه طبعن ساره تعرفت على واحد مره خربان وبدت تلعب دور الحب معه وبعد فتره شافها في السوق وجلس يسولف معها وساره تلعب على الداشر المسكين وبعد فتره دقت ساره على مها وجلست تسولف وتسأل عن العنود وقالت مها ان بكره بتروح ام العنود لشقة خالد وبتودي ملابس العنود وترتب دالوبها وبكل فرح صرخت ساره نعم يمه وقالت لمها بقفل امي تبيني (تصريفه بنت كلب) وعلى طول دقت ساره على الداشر(الي على باله حبيبها) من شريحتها الثانيه الي بدون اسم وجديده وطلبت منه خدمه ومقابل الخدمه راح تطلع معه وبتعطيه الجنس مقابل خدمه طبعن فرح الداشر وسأل وش الخدمه قالت ابيك تروح شقة واحد قد غدرها ويحط حشيش اوحبوب اوسلاح الي يجي بس بسرع وقت راح الرجال لشقت خالد وحصل خالد جالس يستنا اهل زوجته يجيبون اغراض بنتهم المهم قابل الداشر خالد عند باب شقته وسلم عليه وجلس الداشر ينصب على خالد انه جاره في العماره وبعدالسوالف استحا خالد وهو واقف عندباب شقته هو وجاره وقال له اقلط ودخل الداشر وجلس يسولف مع خالد وفجئه دق جوال خالد وطالع لينه ابوالعنود يبيه ينزل يطلع العفش معه انه ثقيل المهم نزل بسرعه خالد والداشر قام وحط تحت كنب الصاله مخدرات بدون محد يحس فيه وطلع بسرعه لصطح لين دخل خالدالشقه ومع خاله وخالته ام العنود وعلى طول نزل الداشر من الصطح وبلغ مكافحة المخدرات عن شقة خالد وان وضع خالد مايطمن اما مخدرات او ارهاب جت المداهمه ودخلت الشقه وبعد التفتيش لقوا المخدرات وابوالعنود وامها وخالد مستغربين وش السالفة اخذت الشرطه خالد والكلبشه في يده وجارينه للقسم بلا حول له ولاقوه وابوالعنود شاف الدعوا مخدرات وعلى طول اخذ عفش بنته وطلع بلا رجعه دخل البيت لقا العنود جالسه على نار وفرحانه برجعت اهلها وتفاجئت بعفشها راجعين به وسألت امها قالت امه لها السالفه وجن جنون ابوها انا اخرالزمن احط بنتي عند مروج مخدرات والعنود خلاص البنت داخت اخذوها لمستشفى دله وهيا تردد خالد خالد وبعدها دخلت العنايه ودخلت مرحله خطره وبعد التشخيص اتضح انها اصيبت بجلطه خطره اثرت عليها بالكامل وهي مازالت توتمتم حبيبي خالد بدون وضوح وخالد مسكين ضاعت سمعته عند جماعته وربعه وصارت حياته جحيم وبعد فتره حكم على خالد باالسجن 4 اربع سنوات سمع خالد الحكم ورفع يديه للسماء ودموع القهر تغزو عينيه يدعوا على من كان السبب وبعدها اصيب بجنون تام وهوا يردد غدن زواجنا ياعنود . اما بالنسبة لساره فقد اصيبت بمرض الأيدز وفضح امرها وتبروا منها اهلها .
وبهذه تنتهي القصة .. اتمنى انها اعجبتكم
من اراد ان ينقلها لمنتديات اخرى فلينقلها لاكن يجب ان يكتب صاحب القصة وهو خالد
وترقبوا قريباً قصة واقعية ومؤثرة ... طلبت من الكاتب ان يكتبها بأسلوبة المشوق والرائع وقد وضع لها عنوان وهو ( بدون مقدمات ياليتة مات)
للكاتب / خالد ..... الملقب بـ ( من اسير الحب الى اغلا سجانة )
ضوء الأحلام 05-02-07, 04:08 PM http://www.4zz.net/up/uploads/b00d7d3547.gif (http://www.4zz.net/up)
كنت على يقين من أن النهاية لابد وأن تكون مؤلمه لا شيء سوى لأنها واقعيه!!!
أشكر جزيل الشكر أخي نسناس على هذه القصه
في إنتظار قصتك القادمه..
تحيتي،،
http://www.4zz.net/up/uploads/ff0776eb6e.gif (http://www.4zz.net/up)
دروب المحبه 05-02-07, 04:13 PM نهايتها حزينه مره
مشكور على القصه الحلوه
سي يوو
الألمــاسي 05-03-07, 05:06 AM لاحول ولاقوة الا بالله...
ليش كل هذا ليش؟؟؟
والله اني مقهوووووور...
تستاهل سارة الايدز...
مشكوور على القصة اخي نسناس..
تحياتي لك((ولد ابو متعب))...
الألمــاسي 09-20-07, 05:53 PM وين القصة الجديد الي وعدتنا بيها ؟؟؟
الفيحاء 09-27-07, 07:45 PM نهايتها حزينه مره
مشكور على القصه الحلوه
|